p. 93Chrisante et Feraulas avoient un dessein si juste, que la Fortune toute ennemie qu'elle est de la Vertu ; et toute irritpe qu'elle estoit, contre l'illustre Artamene ; le favorisa au lieu de s'y opposer : et le hazard voulut que ces deux fidelles Serviteurs, ayant intention d'assembler les plus chers Amis de leur Maistre, à la reserve des Medes ; trouverent tout à la fois chez Hidaspe, le Roy d'Hircanie ; le Prince des Cadusiens, et Thrasibule, qu'Artamene leur avoit envoyé recommander, depuis qu'il estoit arresté. Adusius et Artabase s'y rencontrerent aussi : tous ces autres Princes s'y trouverent, excepté le Roy de Phrigie, qui estoit aupres de Ciaxare, pour tascher de le fléchir. Et comme Artamene estoit le sujet de tous leurs discours, en l'estat qu'estoient les choses ; ils ne les virent pas plustost p. 94qu'ils leur en parlerent ; et leur apprirent que Ciaxare estoit tousjours irrité. En suitte, le Roy d'Hircanie s'adressant à Chrisante, le pria de luy dire, si luy qui avoit une si grande part à l'amitié, et à la confidence d'Artamene ; et qui avoit tousjours esté aupres de luy depuis si long temps (à ce qu'il avoit entendu dire, depuis qu'il estoit arrivé à la Cour de Ciaxare, lors qu'il n'estoit que Roy de Capadoce) n'avoit rien sçeu qui peust les instruire de sa naissance ; afin de voir si par ce costé là, ils ne pourroient point trouver les moyens d'interesser à sa conservation, le Prince dont il seroit nay subjet : ou de se servir du moins de ce pretexte, pour tenir Ciaxare en suspens, en attendant que sa colere fust passée. En effet, adjousta Hidaspe, le moyen que l'Armée de Ciaxare estant composée de tant de Nations differentes, il ne soit pas de quelqu'une de celles-là ? et si cela est, il est bon de le sçavoir : puis que ce seroit encore un puissant motif pour luy concilier les coeurs de ceux qui auroient la gloire d'estre nais sous mesmes loix, et sous mesme Prince. Que si aussi il est nay dans le Party de nos Ennemis ; peut-estre que Ciaxare sçachant qu'il a entre ses mains un homme de cette importance, sera bien aise de le conserver, pour en tirer quelque advantage contre eux. Hidaspe ayant cessé de parler, tous les autres approuverent ce qu'il avoit dit : et Thrasibule adjousta, que peut-estre mesme tireroient ils de cette connoissance, celle des raisons de l'intelligence d'Artamene, avec le Roy d'Assirie, p. 95et celle de l'obstination qu'il avoit, à ne vouloir point les descouvrir à Ciaxare ; qui estoient deux choses qui ne les embarrassoient pas peu.

Seigneurs, respondit Chrisante, je tiens à bon presage, que vous ayez prevenu l'intention de Feraulas et la mienne : puis que nous n'estions venus chez Hidaspe, qu'à dessein de l'obliger d'assembler chez luy, tous ceux que la Fortune y a fait trouver fortuitement. La suitte de nostre discours vous fera voir pourquoy nous avons choisi la maison d'Hidaspe : et pourquoy nous n'avons pas jugé à propos, que tant d'illustres Medes qui sont amis d'Artamene s'y rencontrassent. En un mot, Seigneurs, nous sommes icy pour vous apprendre, qui est veritablement Artamene. Chrisante n'eut pas plustost prononcé cette derniere parole, que tous ces Princes l'interrompirent, par des tesmoignages de joye et d'impatience : et par des souhaits qu'ils firent qu'il peust estre de leur Nation. Non, disoit le Roy d'Hircanie, je n'auray point cét avantage ; je ne suis point assez heureux pour cela : le Prince des Cadusiens disoit aussi la mesme chose : et tous ensemble n'osant l'esperer, quoy qu'ils le desirassent avec ardeur, advoüoient tacitement, que personne n'estoit digne d'estre nay son Souverain : et qu'il l'estoit de l'estre de toute la Terre. Mais enfin un moment apres, Hidaspe le plus impatient de tous, ayant fait assoir tous ces Princes ; et ordonné que l'on ne laissast entrer personne, qui peust interrompre cette narration ; pressa Chrisante de parler. Quelqu'un demanda p. 96alors s'il ne faloit point attendre le Roy de Phrigie ? Mais tout les autres qui brusloient depuis si long temps, du desir de sçavoir les commencemens d'une vie dont ils avoient veû les glorieuses suittes ; ne peurent souffrir cette remise : et prierent tout de nouveau Chrisante de ne les faire plus languir. Alors ce sage Persan, apres avoir esté quelques momens sans dire mot, pour rappeller en sa memoire, l'idée de tant de grandes actions, qu'il avoit veû faire à son cher Maistre ; suivant qu'ils en estoient convenus Feraulas et luy, commença son recit de cette sorte.